تضامنات نسوية مع القضية الفلسطينية

حلقتنا الأولى في #راديو_مساحة من سلسة الحلقات “التضامنات النسوية مع القضية الفلسطينية” تحت عنوان فلسطين كقضية نسوية. مع د. نور أبو عصب، د. نوف ناصر الدين وكريستينا حزبون.

للاستماع

حلقتنا الأولى في #راديو_مساحة من سلسة الحلقات “التضامنات النسوية مع القضية الفلسطينية” تحت عنوان فلسطين كقضية نسوية. مع د. نور أبو عصب، د. نوف ناصر الدين وكريستينا حزبون.

 

المشاركات: كريستينا حزبون, نوف ناصر الدين, نور أبو عصب.

مكان التسجيل: لندن.

نص الحلقة:

مرحبا اهلا وسهلا فيكم في اول حلقة من راديو مساحة (معرفة نسوية متاحة ) فهادا البرنامج رح يكون الموضوع الرئيسي هو التضامنات النسوية مع القضية الفلسطينية

اول مجموعة من الحلقات رح تركز او تسلط الضوء على فلسطين ومن بعدها رح ننتقل الى مناطق اخرى

نور رح ابلّش بعرفش ازا رح ابلّش فيكي ولا بنوف بس السؤال اللي بيطرح نفسو هو انو عم نحكي عن التضامن النسوي مع القضية الفلسسطينية نفكك العبارة شوي شوي

نور : اكيد كتير مهم نفكك هاي العبارة وكتير مهم انو نحكي ليش احنا قررنا نعمل اصلا انو برنامج متخصص عن التضامنات النسوية مع فلسطين

الاشي اللي كتير عم نحسو بآخر فترة انو تعريف النسوية كان عم بيصير اكتر اشي محدود في أطارات حقوق المرأة , اطارات UN ايش بتحكي كيف النساء لازم تعيش ايش بتحكي ايش هي الحقوق اللي لازم تُعطى للمرأة وكل هادا الحكي

وصار الخطاب النسوي للاسف ومع دخول مفهوم المجتمع المدني او منظمات النساء اللي هي جذء من المجتمعات المدنية الموجودة عنا فالمنطقة صار مفهوم النسوية بس محدود فالنساء ولما بنفكر في التضامنات النسوية مع قضية فلسطين احنا كيف بنفكر بالنسوية اساساْ احنا بنشوف النسوية هي شاملة لاكتر من , شاملة كحراك سياسي بحيث انو هدفها انو تقضي على اوجه القمع المختلفة وتقضي على اسباب القمع ذاتو اكتر من انو تحسن من ظواهرو او تعطي اطار اللي هو ممكن نعتبرو أحادي الرؤية بأنو بس تركيز على حقوق مرأة يعني كيف بنعرف النسوية كحراك سياسي هي حراك سياسي ضد اشكال القمع المختلفة منها الرأسمالية اللي بتخلق نظام طبقي قامع ,منها الابوية او الذكورية اللي هي بتقمع النساء والاشخاص والشخصات اللامعياريين واللامعياريات كمان فالقضية النسوية او الحراك السياسي النسوي هو حراك بيتطلع على اوجه القمع وبحاول يفكفكها

نوف : كتير كتير مهم لما نفكر بنسوية ولازم نضلنا نتزكر انو النسوية هي كفكر سياسي او انا دائماً بس بحكيها انو هي لازم تكون نضارات تعيتنا او المنهجية لبنتطلع عليها علشان نفسر اي ظاهرة اجتماعية او اقتصادية او سياسية مش الفكرة نتطلع بس حقوق النساء , هي مافيها نوع من الثنائية هي كفكر سياسي لازم نتطلع على اوجه القمع المختلفة اللي هي بتخلق تقاطعات مختلفة بتجربتنا يعني مثلا احنا كنساء مش بس نساء احنا نساء جايين من طبقات مختلفة احنا نساء جايين من خلفيات مختلفة احنا جايين من كمان اعمار مختلفة بالزبط اعمار وكمان اجساد مختلفة فلما نتطلع على احنا على تجربتنا بنتطلع عليها بطريقة تقاطعية عشان هيك هي مش بالزبط بنتطلع انو النساء ورجال بنتطلع كمان انو من خلالها على تجارب النساء والرجال وما بين هدول النساء والرجال كيف تجربتهم مختلفة , فهي اكتر اشي هي منهجية او هي ادوات احنا بنستخدمها عشان نفسر ظواهر مختلفة , فأحنا بالنسبة النا القضية الفلسطينية طبعاً نسوية مش لان بس بتخص بالنساء لان كمان بتختص بفكرة الاحتلال الصهيوني القامع النا اللي خلق عنا طبقات مختلفة اللي خلق عنا كمان تجارب مختلفة بين النساء والرجال اللي جايين من خلفيات معينة او مختلفة جوا فلسطين وحتى بالشتات لازم نتطلع عليها من وجهة نظر نسوية تقاطعية

كريستينا : اوكي وتقاطعية نور بديك تحكي اشي قبل ما نوصل للتقاطعي ؟

نور : اه بفكر انو بدي احكي بدي اضيف كمان شغلة قبل ما نوصل للتقاطعي انو من الاشياء الاساسية ليش بنفكر انو التضامنات النسوية مهمة مع قضية فلسطين وليش بنفكر انو ليش قضية فلسطين هي قضية نسوية انو احنا لما بنحكي على النسوية كحراك سياسي احنا عم نحكي عن نسوية عم تبحث على العدالة وهاي العدالة فكافة اشكالها مش لازم تكون على حساب شخص اكثر من الاخر او على حساب مجموعة اكثر من الاخرى ولما بتكون لما بنحصر القضية النسوية في مواضيع النساء وما بنطلعها على الساحة الساسية بشكل عام فأحنا بنقلل من قيمتها وبنقلل من قيمة قديش احنا تضامناتنا بحد ذاتها ممكن تكون أداة مهمة من ادوات المقاومة .

نوف : وكمان بدي اضيف على الأشي اللي بتحكيه بخلق ردة فعل يعني احنا لما نفكر بكلمة نسوية لما تعرضي كلمة نسوية على اي ناس بقلك لا هاد أشي احنا مالناش دخل فيو

كريستينا : بالزبط انو هوني انا باجي بفكر انو نسوي معناها انو يخص النساء بس من اي ناحية يخص النساء ؟ هل لان هو جاي من النساء ؟ او لانو هو يتعلق بالنساء ؟

نوف : وهون هو كمان لازم احنا كمان نفكفك الكلمة لمن في كتير فرق بين نسوي ونسائي فلازم نفكفك كلمة النسوية , النسوية لا تعني نساء والنساء ما بيعني نسوية , فهي النسوية كحراك سياسي وفكري بيطّلع على تجارب النساء والرجال والنساء والاشخاص اللامعياريين واللامعياريات فالفكرة انو لما وعشان هيك لما نفكر يعني بالقضية الفلسطينية انها قضية نسوية وليس فقط نسائية بتخلّي كمان الناس الغير نسائية اللي هم مش نساء يفكرو كمان انو هاد جزء منها ,يعني احنا بنحاول نقرب القضية وبنحاول نقرب التجارب من بعض عشان ما نفكفكها

نور : وبدي اضيف كمان شغلة على اللي حكتو نوف عشان نقرّبها شوية لغوياً يعني لما بنفكر مثلاً بالرأسمالية بنفكر فمضادها على انو ايش ؟

كريستينا : يمكن الشيوعية ؟

نور : يمكن الشيوعية يمكن الاشتراكية ؟ او مثلاً لما بنفكر في نظام قمعي اللي هو مبني على وبالتالي لما بنفكر بالانظمة القمعية المبنية على الابوية او الذكورية فهو عكسها نسوي , فنسوي مش بالضرورة نسائي تحديداً نسوي هو فكر مضاد يعني هو حراك سياسي مضاد لحراك قمعي عفواً لفكر سياسي آخر

نوف : والنسوية مدارس يعني اذا بنتطلع هلق مافي اشي نسوي واحد يعني المدارس النسوية اكتر من مدرسة يعني كمان نسويتي ممكن تختلف عن نسويتك ممكن تختلف عن نسوية نور انو هي كمان لانها بتنبثق من تجاربنا احنا اليومية فعشان هيك لازم نفكر ولازم دايماً نشدد على فكرة انو النسوية مالهاش دخل بس بالنساء علشان كمان نجيب اشخاص تانيين اللي هم ممكن بتتأثر تجربتهم فأنو لازم نفكر انو هي كمدرسة او هي كفكر هي بضّم كتير من الناس

بدك ترجعي للتقاطعية حاسستك ؟

كريستينا : اه للتقاطعية وحتى لما بفكر فالنسوي كحراك سياسي بفكر في تقاطع مع فلسطين والتجربة النسوية في فلسطين

نوف : هلق هي الفكرة من لما بالتقاطعية كنظرية نسوية كمان طلعت اللي هي كمان الفكرة منها طلعت انو احنا نتطلع على كيف اوجه القمع المختلفة اللي هي كمان الابوية , الرأسمالية ,الاستعمار , انو كيف بتأثر علينا احنا كأشخاص بس بتأثر علينا بطريقة مختلفة يعني خليني احكي مثلاً انو نتطلع احنا على الاحتلال الصهيوني الموجود بفلسطين هو بأثر علينا بس بأثر علينا بطريقة مختلفة يعني مثلاً بفكرة الجدار اللي نبنا بفلسطين الجدار العنصري بأثر علينا كأشخاص بطريقة مختلفة بأثر على الضفة الغربية غير اللي عم بأثر فيها على اهل القدس مثلاً او غير عن ناس عايشين بحدود المناطق المحتلة ب 48 انو كتير مهم نتطلع انو ما نتطلع على تجاربنا التقاطعية بتخلينا نتطلع على تجاربنا بطريقة مختلفة انو كيف احنا النظام القمعي اللي هو الاستعماري الصهيوني هو موجود بس بأثر علينا كفلسطينيين وفلسطينيات بشكل مختلف يعني مثلاً بأثر على النساء غير ما بأثر على الرجال بأثر على اللامعياريين واللامعياريات غير عن النساء المعياريين والرجال المعياريين

كريستينا : الا انو هادا الاثر فيو اذا بدنا نفكر بالرياضيات وفي دوائر التقاطع هذا الاثر اذا اثّر على الدائرة اللي على اليمين رح يأثر على الدائرة اللي بتتقاطع معها على الشمال وبالتالي الاثر على التنين هيكا ؟

نوف : بالزبط بس بطريقة مختلفة كمان لانو مثلاً الناس اللي يعني الناس اللي عايشين بالضفة الغربية مثلاً بيقدروش يروحو على القدس لانو في حدود ,احنا اللي عايشين بالقدس بنقدر نروح كل مكان بدنا ياه بس هدا ما بيفرجي انو همي بفرجي انو الاستعمار الصهيوني موجود بأثر علينا بس كمان تجربتنا بتختلف فأحنا مش لازم نغتفل او نتجاهل انو التجارب بناتنا بتختلف هدا ما بيعني انو لازم نعمل نوع من المزاودة على تجربتنا كفلسطينيين وفلسطينيات لأ بس انو الاعتراف انو في اختلاف بتجربتنا وهي النسوية التقاطعية .

نور : وبدي اضيف كمان شغلة انو في اختلاف التجربة نفسها وفي اهمية النسوية التقاطعية كمان بتركّز على اهمية احترام هذا الاختلاف انو لما بنفكر بأنو احنا عنا اختلافات بتجاربنا بس بنفس الوقت هاد ما بيعني انو مافي نقاط تضامن او اشياء بنقدر نتفق عليها ونحارب عليها وهوني بنتطلع شوية لفكرة اللي بيخلق تجربتنا كأشخاص بشكل عام هي موقعيتنا وتقاطعيات اشكال القمع المختلفة فمثلاً ممكن يتقاطع النوع الاجتماعي او الجندر تاعي انو انا امرأة مع مثلاً كوني امرأة جاية من طبقات فقيرة نوعاً ما او مع كوني موجودة في موقع مختلف عنك مثلاً انا ساكنة فمكان وانتي ساكنة فمكان مختلف اللي تجاربنا رح تكون مختلفة لهذا السبب والنسوية التقاطعية هي النسوية اللي بتحترم هي الاختلافات هي النسوية اللي بتحترم اختلافات التجارب بدون المساومة على حقوق اي مجموعة على حساب الأخرى

نوف : والفكرة كمان بدي اعطي مثال يعني احنا دايماً بنسمع انو هلق انو مش وقت نحكي على اوضاع النساء انو في اهمية اكتر انو نخلّص من الاحتلال بعدين نجي على نشوف حقوق النساء فالنسوية التقاطعية ما بتفككش الامور بتقلكش هلق في شي احسن من اشي تاني بتقلك كلو مع بعض يعني بنفعش احنا كمان علشان نحرر البلاد ننسى انو هلق مش وقت النساء يعني كمان انو بنفكر انو التجارب متقاطعة كلها مهمة مفيش مزاودة على تجربة اكتر من تجربة وهدا هو اللي احنا بنشوفو انو ليش انو القضية الفلسطينية هي قضية نسوية تقاطعية قد ما سمعنا قصص بتحكي انو هلق خلص مش لازم نفكر بأيش وضع النساء خلينا نخلص من نحرر الارض

كريستينا : وهوني انا رح اربطها , رح اربط الارض بفلسطين وبكون القضية الفلسطينية من بدايتها تم تصويرها على انها امرأة وانو هي بكونها امرأة هي الاضعف وهي التي يمكن اغتصابها وما الى ذلك فممكن هوني نرجع نفكر بالقضية الفلسطينية ككل وعلاقتها مع النسوية وكيف النسوية موجودة فيها وكيف تتجسد على ارض الواقع ؟

نوف : وهون بيخلّي كمان انو لما احنا نتطلع على القضية الفلسطينية كقضية نسوية تقاطعية بتخلينا نتطلع انو كيف تجارب النساء تختلف عن تجارب الرجال يعني مثلاً بأي مشروع الو دخل بالقومية والوطنية بنلاقي دائماً النساء هم بيتشجعو انهم يخلّفو يعني دائماً النساء بتطلع على النساء انو دورهم انو انجاب الاطفال عشان هي الامة تزيد وبنتطلع على اجساد النساء كيف احنا انو بيلعبو دور كتير بنخلّي هي الامة موجودة يعني لازم نتطلع كمان لما نتطلع على التجربة النسوية انو كمان على القضية الفلسطينية نتطلع انو كيف كمان النساء بيتأثرو غير عن الرجال بهي التجربة انو مثلاً في ضغط معين على النساء مش موجود بالطريقة نفسها على الرجل

كريستينا : وهاد الضغط موجود من ناحيتين موجود من ناحية انو عندك المجتمع اللي فيو عادات وتقاليد معينة وعندك الاحتلال اللي عمبحاول يضغط علينا بطرق معينة لحتى يوجّهنا بطرق معينة

نوف : بالزبط وعشان هيك التقاطعية كتير مهمة يعني انتي قلتيها وجاوبتي على السؤال انو عشان هيك احنا بدنا نتطلع على القضية الفلسطينية كقضية نسوية احنا ما بنتطلع بس كيف الاحتلال بأثر علينا كنساء احنا بنتطلع كيف الاحتلال كنظام قمعي بيتقاطع مع نظام قمعي آخر والابوية وبأثرو علينا كنساء ورجال ولامعياريين ولامعياريات بطريقة مختلفة بفلسطين فكمان عشان هيك لما انا كفلسطينية برفض لما حد يقلّي هلق امور النساء مش وقتو ما بينفع لانو كمان لانو في هناك نظامين اللي هو اكتر كمان بس انو هلق نحكي على التنين اللي هو النظام الابوي النظام الصهيوني اللي هو كمان رأسمالي اللي بيتقاطعو وبيأثرو علي انا ك ست بطريقة مختلفة على مثلاً تجربة اخوي او تجربة رجل تاني بالعيلة

مش عم بحكي انو خلينا نكون حذرين انو التجارب مختلفة وكمان بتختلف بيني وبين نساء تانيين جايين من طبقات تانيين مثلاً

كريستينا : نبلّش ندخل بتفاصيل انو مثلا كيف هي التجارب النسوية بتختلف ؟

نور :اه ممكن بدي اضيف كمان أشي على مفهوم الارض والهوية والقومية واعادة بناء الامم عن طريق النساء وبيطلع احمد شوقي بيقول الام مدرسة اذا اعدتها اعدت شعب طيب الاعراق , حابة ارجع لهادا الموضوع واركز عليه شوي انو احنا كتير يعني وحدة من الاشياء اللي ممكن بنغفل عنها مثلاً لما نقول بدنا نشتغل على مواضيع الها دخل بحقوق المرأة انو فعلياً ما بنقدرش نشتغل على حقوق المرأة بدون ما يكون في مقاومة سياسية فعّالة ضد اوجه القمع المختلفة يعني احنا اذا بدنا نحارب الابوية او مفهوم الوصاية الذكورية فدولة الاحتلال هي وحدة من صور هي الوصاية الذكورية وحدة من اشكال الابوية اللي هي دولة احتلال بتحد اشخاص معينين في اماكن معينة بتفرض عليهم انماط حياة وواقع حياتي مختلف عن الناس التانيين الموجودين في المنطقة عامة ً والموجودين بالعالم كمان بتخلّي تجاربهم كتير مختلفة ودولة الاحتلال مفهوم الدولة بشكل عام هو مفهوم قمعي للنساء ولغيرهم كمان يعني مجرّد انو نقرر انو في عنا هوية معينة للبلد اللي احنا عايشين فيها او تجي حكومة تقرر انو في هوية معينة لهي البلد فهي الهوية بترتب على النساء بالتالي انو مهام معينة وادوار معينة اللي المفروض منهم يقومو فيها عشان يكمّلو يخّلو هي الهوية مستمرة ولهدا السبب بنلاقي انو في كتير ترابط قوي بين وجود الاحتلال كمان واوضاع النساء الفلسطينيات بشكل عام يعني بيجو مثلاً ممكن نلاقي نسويات من بيضاوات خلينا نسميهم من دولة الاحتلال اللي بيقولو احنا بدنا نحسّن من اوضاع النساء الفلسطينية كأنو الرجال الفلسطينيين مثلاً هم المشكلة بأنو اوضاع النساء الفلسطينيين سيئة بدل مثلاً ما يتطلعو انو النساء الفلسطينية هدول اللي انتوعم تحكو عنهم جزء من الحدود المفروضة على حركتهم هي حدود دولة هي مش بس حدود عائلة ولا حدود ثقافة مختلفة هي حدود مفروضة علينا من الانظمة القمعية اللي الدولة بتعيد انتاجها بوجودها عن طريق انو تخلق انواع مختلفة من الابوية او الذكورية ازا بدنا نسميها هيك

نوف : وكمان في اشي كتير مهم لازم نفكّر فيو انو بأي سياق فيو احتلال خارجي يعني الاحتلال الصهيوني هو احتلال خارجي مش من عنا اجا اجا من برا فالفكرة انو لازم نفكّر كتير بالمقاومة فكمان مرة بدي ارجع لفكرة انو ليش احنا بتشوف القضية الفلسطينية قضية نسوية تقاطعية لانو كمان بتفسّر مثلاً كيف احنا كفلسطينيين وفلسطينيات بنقاوم ,يعني كتير كمان من الفلسطينيات بيشوفو انو مثلاً يجيبو ولاد او الانجاب هي عملية مقاومة فلازم كمان نفسّر انو كيف هدول النساء بتجربتهم وبصوتهم وبلغتهم بقلك احنا هيك بنقاوم انو كل ما زاد عددنا بيزيد مثلاً مقاومتنا انو تمسّكنا بالارض

كريستينا : بالزبط هوني هاي النقطة اللي كمان كانت نور عم تحكي فيها عن الهوية وعن دور دولة الاحتلال اللي بتيجي بتفرض علينا مفاهيم معينة وقتها بيصير في دور للتضامن النسوي صح ؟ والي هو هادا احد ادوارو لكن في ادوار تانية كمان ممكن يتجسّد فيها او يتمثّل فيها هذا التضامن النسوي واظن في نوعين في نوع اللي متل انو المرأة بتفكر اوكي انا رح انجب بالتالي رح اربّي اكثر ولاد بنزيد عددنا ديموغرافياً وممكن كمان انو نفكّر بطريقة تانية اللي هي الاشياء اللي ممكن نظرياً تتحسن اللي هي انو مثلاً انو لما يكون في حزب معيّن يكون في رئيستو امرأة مثلاً اللي هو بالواقع كتير قليل ما يسير

نوف : وكل اشكال المقاومة بتختلف بتختلف كمان المقاومة بتختلف حسب الطبقة اللي احنا جايين منها يعني بالنسبة النا كأشخاص عايشين تحت احتلال او تحت نظام قمعي معيّن بطريقة احنا كيف بنتطلّع احنا كيف بنقاوم هذا النوع من القمع علينا بيختلف وهذا الاشي كمان بنتطلعلو انو اشكال التضامن بيختلف الموقعية تعيتنا امرار بتحدد كيف بنقاوم وليش عم نقاوم بهلطريقة ولمين عن نقاوم فكمان لازم نتطلع كمان بتقاطعية التضامن والمقاومة عنا انو ايش هي اشكالها ليش عم ناخد اشكال معينة مش اشكال يعني هدا الشكل مش هدا الشكل فالنظرية النسوية او المنظور او النظارات النسوية التقاطعية بتخلينا نفكفك الاشكال المختلفة للتضامن والاشكال المختلفة للمقاومة وليش في اشخاص معينين بياخدو هدا النوع مش النوع الآخروهذي كمان اسئلة لازم نسئلها دايماً ونفكفكها دايماً

كريستينا : وحدة من الاسئلة اللي بتطرحوها هي ايش اشكال التضامن النسوي مع القضية الفلسطينية اللي يمكن من خلالها تجنّب اعادة انتاج مفاهيم القومية الوطنية المجحفة بحق النساء ؟

نور : يعني هو سؤال كبير ما بفكّر انو احنا بنقدر نجاوبو يعني هو سؤال ممكن كمان للعامة والناس انو تشارك معنا افكارها فكيف بتشوف التضامنات النسوية لازم تكون وبفكّر انو الموضوع ممكن نضطر نتطرقلو بحلقة تانية عشان نعطي حقو اكتر فممكن نوقّف اليوم ونكمل الحديث فيما بعد

نوف : شكراً كتير يا جماعة يعطيكم الف الف عافية حنكمل باقي المحادثات بحلقات تانية

نور : اكيد

كريستينا : نهاركم سعيد

لمشاركة المقال على
انضموا الى الحديث