النسوية البيئية والغسيل الاخضر كأداة استعمارية في السياق الفلسطيني

المشاركات:  وداد عساف, شذى عامر, نوف ناصر الدين

مكان التسجيل: يافا

نص الحلقة:

شذى : مرحبا احنا معكو بحلقة جديدة من راديو مساحة الحلقة اليوم بعنوان النسوية البيئية والغسيل الاخضر كأداة استعمارية في السياق الفلسطيني معنا بالحلقة وداد عساف ونوف ناصر الدين مرحبا

التسجيل بتم من مدينة يافا في فلسطين وبحب ابلّش معكو وداد ونوف بالسؤال ايش تعريفكو للغسيل الاخضر؟

وداد :  مرحبا كمان مرة معكو وداد بشوف اليوم الغسيل الاخضر هو كمان اداة اللي هي استعمارية زي ما حكيتي شذى بالتعريف لبتستخدما اسرائيل كمان لتلميع صورتا ان كان في المنابر الدولية او كانت في المنابر والمساحات المحلية او القطرية لتصوّر حالا كأنها هي مع البيئة مع الخضارية ضد قتل الحيوانات واستغلال الحيوانات واحترام الارض والبيئة والاشجار لتغطي الجرائم اللي بتسويها بالمقابل لاستغلال الارض الفلسطينية او استغلال الجيش الاسرائيلي لعدة اماكن اللي هي لفلسطينيين بطرق مختلفة وكمان بقوننة بسن قوانين اسفة اللي هي بتستهدف الاقتصاد الفلسطيني والاكل الفلسطيني والمساحات اللي هي للزراعة الفلسطينية كمان عشان تكبت اي صناعة او اي تجارة اللي هي للفلسطينية

نوف  : شكراً كتير وداد بدي اضيف اشي على اللي حكتو وداد بالنسبة النا لمّا بنفكّر بكلمة غسيل او washing  كمان اللي احنا بنسمعها دايماً هي بنفكر فيها خلينا شوي نفكفكها بفكرة انو كيف بنغسل احنا جرائم معينة ام بتقودها اي دولة او كيان استعماري عمبيحاول يغطي على جرائمو ولازم كمان احنا نفكر انو لما دولة او الكيان الصهيوني  او الدولة ما يسمى فيها اسرائيل بتعمل هي نوع من الغسيل اللي هو نوع من الغسيل اللي بتعملو لان في اكتر من غسيل بتعملو : النوع اللي هو البيئي او الخضري او الاخضر خليني احكي هو عبارة  عن كمان مش بس عشان تبيّض صورتها بجوا فلسطين وجوا حدود فلسطين بس كمان عشان تبييض صورتها للغرب وكمان للعالم برة عشان لما نصير نحكي انو مثلاً نقارن بين ايش اسرائيل بتعمل وايش فلسطين بتعمل هيك بتبيّض صورتها وبتاخد وبتدعي انو عندا حقوق اكتر او مثلاً بتزيد من شرعيتا على ارض فلسطين

شذى : كمان مثال ممكن يكون عالغسيل الاخضر هو الممارسات اللي بتقوم فيها اللي بيقوم فيها الصندوق القومي اليهودي اللي هي منظمة صهيونية استعمارية اللي هي كانت اول من اقام المستعمرات اليهودية وهي مسيطرة على معظم اليوم اراضي فلسطين اللي بتقوم في هي غير المشاريع اللي كتير هي دمرت البيئة منذ النكبة لليوم مؤخراً في السنوات الاخيرة بتم تهجير السكان الفلسطينيين في النقو في القرى اللي هي مسلوبة الاعتراف مثل قرية العراقيب وغيرها واللي بتقوم في في هناك سكان بدو اللي الدولة غيرت جبرتهم يغيرو مكان سكنهم في السنوات الخمسين واليوم تدعي انو هي الاراضي مش تابعة الهم بينما مع انو في اوراق بتثبت الملكية من ما قبل الاستعمار البريطاني حتى واللي بتقوم فيه بيقوم فيه الصندوق القومي اليهودي هوي انو في الاراضي اللي بتم تهجير او اقتلاع الفلسطينيين منها هي بتزرع اشجار وحتى كان في عندها تعاون بينها وبين واحد من البنوك الاسرائيلية اللي انو حط شيكيل اللي هي العملة الاسرائيلية وبنزرعلك فيها شجرة فكانت لكل زباين البنك تقلهن انو شكراً زرعنا بأسمكو شجرة حتى بدون ما تسأل وبعد ما يتم تشجير المناطق الفلسطينية المهجّرة بتم محو اي زكر للوجود الفلسطيني ومش بس بيجيب سواح من برات البلاد تعو شوفو محلا بلادنا الخضرة ما هني كمان بدّعو انو هني كمان اللي احيو الزراعة في فلسطين فهادا استمرار للرواية الصهيونية لان اللي اجو على بلاد اللي فش فيها حدا فش فيها خضرة فش فيها فلاحة قش فيها زراعة وهنّي احيوها فهنّي ما يسمّى هني بيسموها كيبوتات اللي هي المستوطنات اللي هي تشاركية هي كلها حقول زراعية بالأضافة لذلك كتير محميات طبيعية اليوم في فلسطين هي مقامة على اراضي فلسطينية مهجّرة ممكن احنا لمّا نزور هي المناطق لأنو ارضنا وبلادنا بنستعمل تطبيقات اللي هي الكترونية وبتعرّف  على المناطق المهجّرة لانو بتم في محو تام مرات بتصدف انو بنلاقي كومة حجار وبنلاقي صبر بتكتشفي انو هي كان في هون قرية كان في ناس عايشة واليوم هي محمية طبيعية مستنقعات اشجار مزروعات في يافا مثلاً يافا بلد البرتقال مفش برتقال اليوم في يافا ولكن في اشجار اللي بعرفش من وين جابوها من اوروبا اللي حاطين عليها برتقال بلاستيك عنجد امشي بالشارع بتشوفي انو في برتقال بلاستيكي وكأنو يعني ولا اشي تغيّر والزراعة بعدا مستمرّة وهني محافظين عليه بينما اتدمّر… مزارع وبيارات البرتقال مش موجودة … مدمّرة

بذكر سيدي كيف كان حكالي كيف كان اجو واستولو على اراضي ملبّس … ملبّس هي بلد مش بعيدة عن كفرقاسم  وكانت الزراعة اضطروا الفلاحين القلسطينية بعد ما اخدولنل اراضينا انو نشتغل هناك عشان نعيش فصارو هنّي يعلّمونا عن اساليب كيف نعتني بالزراعة وكيف نطورها بينما هي هي احنا بنعرفها يعني النباتات بنعرفها احنا ومغمضين يعني اسمائها بيجو بيسمّوها قال تسميات جديدة العصافير بيسموها تسميات جديدة النباتات الحيوانات هذا كلّو جزء من الغسيل الاخضر من المحاولات لتجميل وتلميع صورة اسرائيل عشان تغطّي على جرائم الثانية اللي بتسويها كمان مثال كتير صعب هو اقامة محارق للنفايات كلها اغلبها مش كلها آسفة بيجانب بلدات عربية وكثير منها كمان في الضفة هي برضو جزء من السياسات انو عنّا كل شي جميل حتى الجدار الفاصل جدار الفصل العنصري جدار الابارتايد (الفصل العنصري( اللي بيمرق من الجانب الاسرائيلي حدو في اشجار ومزروعات وورود وبيجنن يا محلاه بينما بالشقة التانية

نوف : الفلسطينية خلينا نقول

شذى : شقتي الفلسطينية …منظر بشع مو بشع بس هني بيجمّلو بواسطة المزروعات

وداد : عفكرة بدي اتذكرت اسّا وهي شذى تحكي بقصة من ستي اللي حكتلي ستي فلاحة وبرعم هي من برعم اللي هي قرية بالشمال اللي تهجّرت ودمّرت ولحديت اليوم اللي بيميّز برعم وكمان اقرث انو وعدوهم يرجعو على قراهم في وعد اللي هوي بأمر من المحكمة طبعاً لحديت اليوم ما مارسو هادا الامر والوعد بس الورقة لحدّيت اليوم موجودة واللي هي هي قرية جداً قريبة على جنوب لبنان يعني هيك للمعلومات بس ف ستي بتحكي انو بعد ما تهجّرو من برعم راحو على الجش الللي هي كمان قرية فلسطينية ومن بعدها بعد ما كان في امر عسكري وكانو النساء يعني بيشتغلو فأجو الاسرائيلية اليهود الصهاينة وبيجو بيقلولن يلّا تعالو يا نساء ما انتو بتعرفو تشتغلو بالارض وكذا فكانو يروحو يشتغلو بزراعة ارض اللي هي ارضهن لتصادرت فوحدة من النساء وهي قتلو اخوها وهي عم تحصد الارض وكذا بتشوف محراث اللي هو محراث اللي لأخوها فنجنّت مسكت التراب وبلّشت تنعفو على راسها وتبكي ومن وقتها ما رجعتش على الشغل ولامرة بس هي امثلة كمان لكيف بيحتلّو يعني احتلّو الارض استخدمو خيراتها وخلّونا احنا نشتغل فيها لما فش عندك ولا اي  وسيلة ثانية يعني بدك تعيشي

نوف : هي كمان الها دخل كتير هادا ذكرتوني بكتير امثلة بكيف كل حد فينا عم بحكي من تجربتو كفلسطينيات عايشين على هي الارض انو بالقدس بالقدس بتمشي انتي بجعفات مثلاً او بيت حنينا في طبعاً البيوت الفلسطينية وفي كمان شو اكم من متر بعيد في مستوطنات وهي المستوطنات طبعاً انبنت على ارض فلسطينية وبنشوف كيف من جوا هي المستوطنات ارض تانية وكيف الفلسطينية كيف طريقة صار في نوع من يعني اظهار كمان الارض الفلسطينية او المنطقة الفلسطينية كأنها بشعة كأنها يعني فيها كتير زبالة كأنو كمان الفلسطينية  بيعرفوش يديرو بالهم على ارضهم بيعرفوش يستثمرو الارض هي بيعرفوش انو يديرو بالهم على شوارعهم دايماً ريحتهم مع انو البلدية ما بتجيش تاخد الزبالة من عند البيوت الفلسطينية اما المستوطنات كل اسبوع شو اسبوع كل يوم بتنلم الزبالة من عندهم فكمان لمّا حد مش من هي الارض مش من هي البلد بيمر بهي الشوارع بيشوف انو الارض الفلسطينية او المناطق الفلسطينية هي مناطق مزبلة خليني احكي او مناطق مش لائقة مقارنتاً بالمناطق اللي عايشين فيها اسرائيلية ومستوطنين وانو منظرها بيكون كتير غير فهادا كمان جزء من تشويه الصورة الفلسطينية او تشويه اه وتبييض الاسرائيلية

وداد : بدي احكي كمان موضوع اللي بخصوص اللي ذكرتو شذى عن صندوق اراضي اسرائيل او دائرة اراضي اسرائيل المؤسسة الصهيونية اللي هي اليوم شذي ايش انو مسيطرة على اغلب الاراضي اليوم بدي ارجع على برعم لانو هي تجربتي الاخيرة كمان واللي كتير قريبة الي على قبل بشهر 4 رحنا انا وعيلتي على برعم بدنا نزور قبر سيدي اللي مدفون ببرعم ففي فوتة لهناك انو بيجو بيحكولك هي هادا الصندوق الصهيوني اللي هو عامل ما يسمّى parks  او الاماكن اللي هي نحافظ عليها ونجمّلا على اراضي برعم فبيجو بدن ياخدو دخولية بدن ياخدو من اهالي برعم دخولية او من كل اللي بدن يفوتو يعني بيستثمرو اليوم بأنو اه هي

نوف : رأسمالية يعني عم يعملو مصاري على حساب شعب آخر كمان

وداد : هادا المثال اللي كنت بدي ازيدو

شذى : اه استخدام استخدام المواقع الاثرية برضو جزء من هادا الغسيل يعني .. اه قيسارية وين قرية قريوت كمان اللي مقامة صفد مقامة حد قريوت مستوطنة جداً جداً كبيرة ضخمة يعني وفيها مركز زيارة للسواح واهالي قريوت ممنوعين انو كانو سنين من انو يدخلو اليوم برضو بدفعوهم دخولية فكتير المواقع الاثرية بيغيرو روايتها بيحطو رواية مثلاً اللي بيمشي اليوم بشوارع يافا بيشوف انو فيش زكر لأي اشي فلسطيني حاطين صور حيوانات دلافين وفيلا وقردة يعني نزع مضحك مبكي .. نزع سلخ الحيّز عن الرواية وتسويقو كأنو اشي سياحي اثري اللي التاريخ بيبدا في قبل 1000 سنة يعني من 1000 سنة ما صرش اشي

نوف : وهون هي الفكرة قديش مسيّس هادا الاشي …استعمارية مسيّسة

شذى : تسييس تسييس التراث الميراث الثقافة المواقع الاثرية النباتات البيئة الارض متل كل الامثلة اللي ذكرتن … الفن للاسف الامثلة لاتنتهي

وداد : عنجد لا تنتهي

شذى : وكيف بتشوفو انو هي القضية هي قضية نسوية ؟

وداد : كيف بشوفها كقضية نسوية لأنو القضايا النسوية هي طبعاً قضايا بتطلّع على  الاستعمار وعلى موضوع الرأسمالية والعنف كسلّم يعني برأس السلّم لمحاربة كل هي السياسات فأحنا اذا بنتطلّع على القضية تبعت العنف ضد الحيوانات او احترام البيئة واحترام الوجود اللي احنا مشاركين الارض معو .. عدم احترامو واستغلالو بطريقة اللي اليوم الرأسمالية عم تستغلّو هي موضوع اللي طبعاً كنسويات المفروض انو نحطّو معنا شريك وشريك لكل طبعاً لكل اشكال العنف اللي كمان احنا كنساء بنمرقها فهيك بشوف هون في ربط بين ايش انا بدي استخدم ان كان بأستهلاكي بالأكل تبعي ان كان بطريقة معيشتي والخ فهي كلها مواضيع اللي هي بترتبط مع الحركات النسوية مش كل الحركات النسوية بحكي للتنويه هي مش حركات نسوية اللي هي بيضاء او حركات  اللي هي بتفرض الخطاب على النساء الأخريات اللي لازم يكون بطريقة كتير معينة ف لأ احنا عم نحكي على طبعاً خطاب اللي هو بيضم فيو حركات اللي هي بتحكي اكثر شاملة

نوف : بدي اضيف على اللي حكتو وداد هون يعني احنا بنفكّر بنسوية اظنّي  كمنهجية انا بالنسبة الي النسوية هي اكتر من اكتر من انو نتطلّع على حقوق النساء او حقوق الرجال او ما بينهما الغير معياريين هي عبارة النسوية هي كأن انا بعتبرها هي منهجية عشان نقدر نحلل ونفكفك كل انظمة القمع اللي احنا بنواجهها بغض النظر اذا احنا نساء احنا رجال احنا اطفال احنا غير معياريين غير معياريات جايين من طبقات مختلفة ففكرة النسوية هي بتاخد بعين الاعتبار كل انظمة القمع اللي هي بتواجهنا كمخلوقات كمان على هي الارض فالنسوية يعني بنتطلّع على انو الغسيل الاخضر من قضية نسوية لانو احنا كمان عم نتطلّع كمان كيف انو الاستعمار الصهيوني او اسرائيل كيف بتستخدم اللي هي بين اقواس (حقوق الحيوان ) او  حقوق البيئة عشان كمان تمشّي اشياء يعني هي لمصلحتا الخاصة فأنا بالنسبة الي بشوف انو هي عبارة عن النسوية التقاطعية بتاخد كل انظمة القمع بعين الاعتبار وانو كمان احنا كبشر كيف نتعامل مع الارض هي كيف احنا بنستغل هي الارض هي كيف احنا كمان بنحاول انو نستغلها او لا نستغلّها لأغراض سياسية اجتماعية اقتصادية او لأ فما بنقدر نتطلّع على فلسطين وعلى الغسيل الاخضر اللي عم يصير بفلسطين من غير ما نتطلّع عليها من وجهة نظر نسوية

وداد : يعني هون انا بدّي  احكي على سبيل المثال عن الحركات اللي هي حركات تعتبر حالها حركات خضرية اسرائيلية اللي بالمرة يعني ازا بنرجع تاريخياً للحركات اللي هي خضرية بدأت يعني بدت الحركات الخضرية كحركة اللي هي مناهضة للأستعمار مناهضة للأستعمار هادا بيقول انو مش بس استعمار وسياسات الاستعمار وما بينهما هي الرأسمالية يعني ملان ملان حركات اللي هي خضرية في كتير ناس يعني اللي بتعتبر حالها خضرية مش عشان الرفق بالحيوان ومش عشان بتحبّش اللحمة والخ انما كمناهضة للرأسمالية فاليوم اغلب الحركات اللي هي اسرائيلية اللي بتفتخر اتها مع الرفق بالحيوانات ومع ومع ومع بتطرقش ولا بأي شكل للرأسمالية فهادا بيفرجي قديش في يعني وجهين للعملة ويعني بدي اعطي مثال زغير قبل فترة عم بتطلّع في صفحة اللي اسمها  animalsاللي موجودة بعتقد بتل ابيب اللي بيجو بنشرو بصفحتن بالانستقرام انو والله برافو ل burger king  انو هني صارو يسوقو صارو بيعملو برغر اللي هي خضري يعني هادا بيفرجينا هادا مثال زغير اللي بيفرجينا على او هي الحركات هي مش حركات اللي هي ضد الرأسمالية هي عمبتسوّق بالأحرى للرأسمالية فهادا الفرق يعني بين كمان حركات اللي هي اذا بدنا نحكي على الخطاب اللي هو بيضم فيو كمان النسوية كمان بمبادءو ضد القمع فهون اللي عم نشوفو خاصةّ بتل ابيب انو اه كمان مرة الواحة اللي هي حتى بدي اسميها حتى الفقّاعة اللي اه والله تعو نفرجي كل العالم قديش احنا خضرية قديش احنا حرّين قديش احنا بنعطي حقوق للكل فهي كمان وحدة من الامثلة اللي احنا ممكن نشوفها يعني

شذى : شكراً وداد ونوف على هادا النقاش الحلو وبفكّر انو موضوع كتير مهم انو ينطرح ويبلّش يتفكفك ما نتطلعش عليه بالصورة السطحية خصوصاً انو عميلاقي رواج كتير عالمياً وغربياً ومتل ما حكيتو اسلوب الحياة الخضري والاهتمام بالبيئة مش قضية غربية متل ما بيحاولو يصوروها اليوم متل اي قضية ونضال عادل ان ما كان متقاطع بيشوف اساليب القمع التانية لعم تتمارس بكون قضية فارغة وأداة كمان أداة من ادوات اللي كتير موجودة لغسل صورة الجرائم ان كان دولة اسرائيل او دول ثانية خلال كل العالم متل الامثلة اللي ذكرتوها شكراً الكو

نوف :  شكراً كتير

وداد : شكراً